PARNO ADAT
Assalam mualaikum warah matullahi wabarakatuh
Sejak mano mulai munyalo, sejak lubuk tebing tarah
Sejak mano mulo bukato, kito mulo dengan bismillah....
Seiring balam dengan murbah, balam lalu murbah mandi
Seiring salam dengan sembah, sembah lalu salam kembali
Salam kami tujukan pado kayo depati ninek mamak, anak jantan
taganai rumah serto kayo yang duduk seisi rumah ini
Kecik banamo gedang bagela, Kecik idak basebut namo, gedang
idak bakato gela, Sado kito dilingkung bendun yang empat
Di tanai lantai dengan bakeping, di tudung atap dengan basenggit
Manyalo di selo lubuk keno lah ikan si lumbo lumbo
Sirapat kito dengan duduk, kayo pumen tumbuk kato
Gedang ayi sungai landai, pasang cinak dari hulu
Bukan kanti ini nak ngacak cerdik dengan pandai
Kito nuhut telatah telitih uhang tuo dulu
Gedang ayi dari hulu, terendam pasa sungai landai
Bukan kanti ini nak nyempung tekap penghulu
Idak pulo nak mecat batin di balai
Adopun kanti ini,
Belumnyo lentik cinak taji,belumnyo landai cinak dulang
Belumnyo cerdik cinak kanti belumnyo pandai cinak urang
Bukan pulo kami nak ngapat ateh ngan papat
Idak pulo nak ngacap ateh ngan uncin
Adopun kami ini, keno sayo keno ucap keno angkat keno anggung
Nyampaikan hajat sipengko nyampaikan hajat sepangkalan
Mako kayo itu tumbuk kato, lah badik, lah batampi, lah ba ayak lah
baindang, lah ba ima ili ngan mudik, Kayo itu pusat jalo purimbun ikan.
Kayu tinggi nampak dari jauh, kayu gedang mumenoh alam
Tempat bacupak gantang beteduh
Adopun kayo itu, ibarat kayu gedang tengah negeri
Batangnyo gedang tempat busanda, Daunnyo imbun tempat
bateduh, tempat belindung di musim paneh, Akanyo nambago
bauhat tunggan, dahan talitih bajilo panjang, Ranting menjadi
sangkak burung tigo basaudaro
Mano sangkak burung tigo basaudaro
Ngan tau kato adat kato pasko kato undang batando piti
Kato serak bahadis dalil, Kayo yang biaso bapasi ili bapadang
mudik, Tahan ndam salapuk tali tahan baka sapadam maro
Dengan tau di hadis nabi dalil Qur’an
Kayo itu ibarat ayam putih terbang siang,Inggap di kayu idak
badaun, basuluh ka matohari, basalai kabulan bintang
Bagalanggang di mato uhang banyak
Habis gayung pedang di letak, habis kaji surat di lingkut
Habis kato bicaro usai
SPARNO ADAT
Sejak mano mulo menyalo sejak lubuk tebing tarah
Sejak mano mulo bukato kito mulo dengan bismillah
Pasang dap pasang palito di mbu makonyo pejah
Kito buduo ini kno ucap kno sayo
Jangan pulo jadi duso dengan salah
Adopun seisi uhang umah ini ibarat,
Ibarat sepucuk bak jalo, ibarat seiring cinak pukat
Ado lubuk purimbun ikan, Agi mintak di ajun agi mintak diarah
Adopun kayo itu, Ibarat ujan pengganti payung,ibarat licin
pengganti tongkat, Ibarat kelam pengganti suluh,
Suluh bindang ugo pumen kayo dalam negeri
Adopun kayo itu,
Ibarat makai sko padi, kian berisi kian menunduk
Kian tuo kian balaja, kian tau kian batuik
Ado dis melayu ngato
Lalu lalang murbah mandi batemu ayi basimpang duo
Salam lalu sembah kembali, hajat kalua pulo dari sepengko
Mak tau kapado bungku balipat pado bangka
Mak tau kapado usu balipat pado asa
Duo dis melayu ngato
Kapasa membeli benang, tibeli si benang pilin
Idak di tap idak di bilang, jangan pulo serupo nak makan hak pulih
malin, Cinak ladin punggali tubuh, cinak tebu di punggung musang,
Cinak buluh hanyut tengah duo weh ilang timbun tenggelam idak
tentu ujung dengan pangken, idak pulo wajib pakai di kito.
Mano dengan wajib pakai dikito
Terbit ayi dari hulu, terbit getah dari batang
Terbit angin dari puhun terbit kato pulo dari mulo
Mano jadi mulo kato
Ateh kito ditunggu tanah tak ajo dengan jenang
Ateh kito di sungkut langit di tanai bumi
Ateh menjadi so 2,3 manso yang 4
Mano so 2,3 manso yang 4
1. Perumpun
2. Laki-laki
3. Ama rajo
4. Ama allah
Mano terhadap pegang perumpun
Tarik kain dengan silepeh, pandai balingkek lipat sanggunmTau
tiru turih, tauladan, ambak, anyam, batenun, bagantih
Bapiuk gedang batungku jarang, bakembang lapik bakembang tika
Lpeh mendah pgi pagi nantik mendah tibo petang
Di tantik dengan hati suci muko dengan jernih
Itu terhadap pegang perumpun
Mano terhadap pegang laki-laki
Tarik kain dengan silepeh lekek lita dengan siincung
Tarik ladin dengan buliung, masuk imbo kalua imbo, Masuk bateh
kalua nyincang, tarah nikun, nganggung, nebat balaman, naki bukit
dengan tinggi nurun lurah dengan dalan, menjemput barang
dengan jauh ngangkat barang dengan berat
itu terhadap pegang laki-laki
Mano terhadap pegang ama allah
Turun ayat dari allah,turun hadis dari nabi,jadi quran 30
juzz,jadi kitab 30 lepak
Diturun dipanaek, di kembang di baco sampai minin agi ugo
Kemudian dari pado itu berdirilah imam ketit dengan
barempat, Dengan megang angko bulan angko taun
Bulan 12 Hari 1,katiko 5 sabat 4 sifat 20 ama yang 2
Mano hari satu hari jumat yang kito fardu
Mano katiko 5 sembahyang 5 waktu
Mano sabat 4, sabat allah jibril, mikail, israfil, israil
Sabat nabi abu bakar, saidina, umar, ali
Mano amal yang duo amal sunnah amal fardu
Mano terhadap pegang ama rajo
Tari indah tari mustiko,umbai mangkuang kulit manih
Tau uhang masuk uhang kalua, Ayam basimbai iku, puyuh panjang
rungut, ketitir panjang rantau.
Manaokah uhang iyuk uhang timpang uhang jibut balik rupo.
anggah kapien uncin tanduk, nyuhung ka raso lelih pipi, tau pisang
tuo kaladi berisi, tebu melingkar urat, pisang masak di guyang
guyang, Bunting bereh mendap kedalam, bunting padi idak bajudu
Kalu idak di arah diatur, talabeh tadendo pado rajo dengan 7 guling batang.
Bersambung........
